Ysgoloriaeth Pritchard a Moore 2026

Bu gan Dr Pritchard a’r Athro Moore yrfaoedd nodedig yng Nghanolfan Ganser Felindre ac roedd ganddynt ddiddordeb mawr mewn ymchwil ym maes radiotherapi.

Gyda’i gilydd, bu iddynt gefnogi datblygiad gyrfa academaidd nifer o aelodau staff a helpu i sefydlu Felindre fel canolfan ragoriaeth ymchwil. Bu’r ddau hefyd yn gwasanaethu ar Fwrdd Ymddiriedolwyr Ymchwil Canser Cymru yn flaenorol, gyda’r Athro Moore yn mynd ymlaen i fod yn Llywydd yr elusen.

I anrhydeddu eu hetifeddiaeth, mae Ymchwil Canser Cymru wedi sefydlu Ysgoloriaeth Pritchard a Moore, a fydd yn cefnogi ymchwilydd talentog i gynnal prosiect ymchwil arloesol ym maes radiotherapi neu feysydd cysylltiedig.

Mae’r ysgoloriaeth yn agored i bob rhan o Gymru a bydd yn ariannu myfyrwyr PhD neu gymrodoriaeth ôl-ddoethurol, naill ai’n llawn amser neu’n rhan amser.

Gwahoddir cynigion o’r disgyblaethau canlynol:

• Radiomeg a Radiogenomeg
• Delweddu Meddygol
• Radiotherapi Moleciwlaidd
• Astudiaethau cyn-glinigol (megis Radiofioleg, sensiteiddwyr difrod DNA)
• Therapïau cyfunol sy’n cynnwys radiotherapi
• Cynllunio Triniaeth a Sicrhau Ansawdd
• Technolegau radiotherapi newydd

Os nad ydych yn siŵr a yw eich cynnig yn cyd-fynd â chwmpas yr Ysgoloriaeth, cysylltwch â’r Pennaeth Ymchwil, Dr Lee Campbell, yn lee.campbell@cancerresearchwales.org.uk.