Ymchwil Canser Cymru yn croesawu’r adroddiad CReST newydd

Mae Ymchwil Canser Cymru wedi croesawu cyhoeddi'r adroddiad newydd: 'Strategaeth ymchwil canser Cymru, CReSt: dathlu ein cynnydd ar y cyd' gan Ganolfan Ymchwil Canser Cymru.

Wedi'i gyhoeddi i gyd-fynd â chynhadledd Canolfan Ymchwil Canser Cymru 2026, mae'r adroddiad yn nodi tair blynedd ers i Strategaeth Ymchwil Canser Cymru (CReSt) gael ei chyflwyno yn 2022 i gryfhau ymchwil canser ledled Cymru drwy gydweithrediad rhwng prifysgolion, y GIG, elusennau a phartneriaid diwydiannol.

"Mae Ymchwil Canser Cymru yn croesawu cyhoeddi'r adroddiad hwn sydd yn amlygu'r cynnydd a wnaed ym maes ymchwil canser ledled Cymru yn y blynyddoedd diwethaf," meddai Dr Lee Campbell, Pennaeth Ymchwil Ymchwil Canser Cymru.

"Ni yw'r elusen ymchwil canser Cymreig a rydym wedi buddsoddi dros £41.86 miliwn i arianu'r ymchwil ddiweddaraf ym maes diagnosis a thriniaeth canser yng Nghymru ers i ni gael ein sefydlu yn 1966. Mae'r adroddiad hwn yn dangos ein bod yn chwarae rhan flaenllaw gydag arloesi ym maes ymchwil canser yng Nghymru."

Rhoi sylw i gyllido Ymchwil Canser Cymru

"Mae ein Menter Ymchwil Tiwmorau'r Ymennydd, a sefydlwyd gennym i fynd i'r afael â'r diffyg cynnydd gyda gofal am gleifion â thiwmorau'r ymennydd dros y 30 mlynedd diwethaf, yn enghraifft allweddol o'n gwaith arloesol ac mae'r fenter wedi ei hamlygu yn yr adroddiad newydd hwn," ychwanegodd Dr Lee Campbell.

"Mae tri o'n treialon clinigol arloesol - COLOSPECT, BiCCC a ThinkCancer! - hefyd wedi eu cynnwys yn yr adroddiad am eu cyfraniad tuag at wella triniaeth, diagnosis cynnar a sgrinio canser yng Nghymru. Mae'n galonogol gweld y gwaith mawr hwn yn cael ei gydnabod ar y lefel hon gan ein cyd-ymchwilwyr yn y gymuned ymchwil canser."

Dengys yr adroddiad bod 11,546 o gleifion Cymreig wedi cymryd rhan mewn astudiaethau clinigol dros y tair blynedd diwethaf. Ac mae astudiaethau a gyllidwyd gan Ymchwil Canser Cymru yn gyfrifol am bron i 20% o'r cyfanswm hwnnw, gan ddangos effaith sylweddol ein gwaith ar lefel genedlaethol.

Gweld y potensial

Yn ogystal, mae sawl un o'r 'uchafbwyntiau ymchwil' a sonnir amdanynt yn yr adroddiad wedi elwa o gefnogaeth flaenorol gan Ymchwil Canser Cymru. Mae'r rhain yn cynnwys treial clinigol firotherapi ATTEST a'r cwmni Awen Oncology, sydd ill dau wedi'u seilio ar ymchwil a fu'n cael ei hariannu gennym dros nifer o flynyddoedd.

"Ni ellir tanbrisio effaith y gefnogaeth gynnar gan Ymchwil Canser Cymru, yn darparu'r sylfeini ar gyfer y llwyddiannau presennol. Rydym yn gyffrous i weld y potensial y gwelsom yn gynnar yn dwyn ffrwyth," meddai Dr Lee Campbell.

Mwy i'w wneud

Er bod y cynnydd a'r llwyddiant a welir yn yr adroddiad newydd yn ysbrydoledig iawn, mae dal llawer mwy i'w wneud. Yn anffodus, mae Cymru yn dioddef o ganlyniadau gwael ac anghyfiawnderau eang ar gyfer canser, felly mae cyfle sylweddol i wella ac achub bywydau ledled y wlad.

Bydd Ymchwil Canser Cymru, fel yr elusen ymchwil canser Cymreig, yn parhau i gefnogi'r gwyddonwyr a'r clinigwyr gorau i wthio'r ffiniau ac adeiladu ar y cynnydd sydd eisoes wedi'i wneud.

"Byddem yn hoffi diolch i'r holl wyddonwyr, clinigwyr a chleifion yr ydym wedi eu hariannu a fu'n rhan o'n hastudiaethau. Yn bwysig, hoffem hefyd ddiolch i'n holl gefnogwyr a gwirfoddolwyr, oherwydd heb eu hymdrechion hwy, ni fyddai dim o hyn wedi bod yn bosibl. Gyda'n gilydd gallwn wneud gwahaniaeth, fel Cymru wedi ei uno yn erbyn canser," gorffennodd Dr Campbell.