Datblygiad a Nodweddu Strwythurol Biotherapiwteg Imiwno-oncoleg

Mae imiwnotherapïau ar gyfer canser, fel celloedd CAR-T a brechlynnau canser, wedi trawsnewid canlyniadau i rai cleifion, ond nid yw eu buddion wedi’u rhannu’n gyfartal ledled Cymru hyd yn hyn oherwydd amrywiaeth genetig yn y ffordd y mae systemau imiwnedd pobl yn adnabod canser. Mae’r gymrodoriaeth hon yn mynd i’r afael â’r her honno wrth ddatblygu’r genhedlaeth nesaf o fiotherapiwteg imiwno-oncoleg a gynlluniwyd o’r cychwyn cyntaf i weithio ar draws yr amrywiaeth o gefndiroedd genetig a geir ym mhoblogaeth Cymru.

Wrth gyfuno bioleg strwythurol uwch ac imiwnoleg, bydd yr ymchwil hon yn datgelu sut mae therapïau celloedd T yn adnabod canser ar lefel foleciwlaidd, gan alluogi dylunio rhesymegol ar gyfer triniaethau mwy effeithiol a chynhwysol. Nodwedd bwysig o’r gwaith hwn yw’r ffocws ar fathau o HLA sydd heb gynrychiolaeth ddigonol, gan helpu i fynd i’r afael ag anghydraddoldebau iechyd sydd ar hyn o bryd yn cyfyngu ar fynediad at imiwnotherapïau arloesol.

Bydd y gymrodoriaeth yn gwreiddio arbenigedd mewn imiwnotherapi canser a bioleg strwythurol yng Nghaerdydd, gan gryfhau capasiti Cymru i ddatblygu triniaethau ecwitïol a chynaliadwy. Cleifion yng Nghymru fydd yn elwa gyntaf drwy fynediad gwell at imiwnotherapïau yn y dyfodol sydd wedi’u cynllunio i weithio i bawb, cyn iddynt gael eu mabwysiadu’n ehangach ledled y DU ac yn rhyngwladol.