A yw cod Hox sy’n benodol i feinwe yn sail i organotropiaeth tiwmorau?

Nod y prosiect hwn yw gwella canlyniadau i gleifion canser wrth ymchwilio i’r rhesymau pam mae tiwmorau’n lledaenu i rai organau penodol (metastasis) ac nid i eraill. Mewn rhannau o Gymru, yn enwedig Gogledd Cymru, ceir nifer uwch o achosion o ganser a marwolaethau oherwydd canser, ac o’r herwydd, mae metastasis yn bryder iechyd lleol hollbwysig. O ystyried y bydd yr ymchwil hon yn cael ei rhoi ar waith mewn gwasanaethau patholeg lleol os yw’n llwyddiannus, bydd cael dealltwriaeth o’r mecanweithiau moleciwlaidd sy’n gyrru metastasis penodol i organau o fudd i gleifion yng Nghymru wrth alluogi clinigwyr yng Nghymru i ragfynegi risg yn gynharach, ac wrth ddatblygu therapïau wedi’u targedu i atal neu gyfyngu ar ledaeniad canser.

Bydd y prosiect hwn yn nodweddu mynegiant genynnau Hox sy’n benodol i feinwe mewn tiwmorau cychwynnol ac eilaidd a meinweoedd normal cyfagos a gymerwyd o gleifion yng Nghymru. Wrth nodi patrymau cod Hox sy’n rhagfynegi metastasis sy’n benodol i organau, ein nod yw darganfod biofarcwyr a thargedau therapiwtig. Mae canolbwyntio ar samplau o gleifion lleol yn sicrhau perthnasedd trosiadol ar gyfer GIG Cymru, yn cefnogi oncoleg fanwl gywir, ac yn mynd i’r afael ag anghydraddoldebau rhanbarthol mewn trin canser. 

I gleifion yng Nghymru, mae gan yr ymchwil hon y potensial i wella dulliau o ragfynegi metastasis, llywio ymyriadau a gaiff eu personoli, a lleihau risg canser eilaidd. Yn y tymor hwy, mae’n cryfhau arloesedd dan arweiniad Cymru ym maes bioleg canser, ac yn sicrhau bod cleifion lleol yn elwa gyntaf ar y darganfyddiadau hyn.