Enwi Ymchwil Canser Cymru yn Brif Bartner Elusennol Cyntaf Marathon Mawr Cymru

Bydd y bartneriaeth yn rhoi cyfle i redwyr ymgymryd â’r her 26.2 milltir wrth godi arian hollbwysig ar gyfer ymchwil canser, gyda disgwyl i’r sawl sy’n codi arian i Ymchwil Canser Cymru gael blaenoriaeth unigryw i lefydd elusennol ar gyfer Marathon Mawr Cymru 2027.

Mae’r bartneriaeth yn nodi pennod newydd bwysig i Marathon Mawr Cymru wrth i’r digwyddiad baratoi i groesawu cenhedlaeth newydd o redwyr a chynyddu cyfleoedd i gyfranogwyr gyfuno eu her marathon â chodi arian ar gyfer achosion sy’n agos i’w calonnau.

O ran Ymchwil Canser Cymru, daw’r bartneriaeth yn ystod blwyddyn nodedig i’r elusen annibynnol yng Nghymru, wrth iddi ddathlu 60 o flynyddoedd yn ariannu ymchwil arloesol i wella’r ffyrdd y caiff canser ei ddiagnosio a’i drin yng Nghymru.

Dywedodd Adam Fletcher, Prif Swyddog Gweithredol Ymchwil Canser Cymru:

“Rydyn ni’n falch iawn o fod yn brif bartner elusennol cyntaf Marathon Mawr Cymru, yn enwedig wrth i elusen Ymchwil Canser Cymru ddathlu ei phen-blwydd yn 60 oed.

“Ers chwe degawd, rydyn ni wedi bod yn cefnogi ymchwil canser hanfodol yng Nghymru, a bydd pob rhedwr sy’n derbyn yr her 26.2 milltir ar ran Ymchwil Canser Cymru yn ein helpu i barhau â’r gwaith pwysig hwnnw. Gall yr arian sy’n cael ei godi gan ein rhedwyr helpu i gefnogi ymchwil a allai wella sut mae canser yn cael ei ganfod, sut mae’n cael ei ddiagnosio a sut mae’n cael ei drin yma yng Nghymru.

“Mae Marathon Mawr Cymru yn gyfle cyffrous i ddod â rhedwyr, cefnogwyr a chodwyr arian o bob cwr o Gymru a thu hwnt ynghyd. Rydyn ni’n falch o fod yn rhan o’r bennod nesaf hon ac yn edrych ymlaen at weld ein cefnogwyr yn ymgymryd â’r her wrth i ni nodi ein 60ain mlwyddiant.”

Blaenoriaeth unigryw i redwyr sy’n codi arian i Ymchwil Canser Cymru

Fel rhan o’r bartneriaeth, bydd rhedwyr sy’n codi arian i Ymchwil Canser Cymru yn cael blaenoriaeth unigryw a chyfle i sicrhau lle ym Marathon Mawr Cymru cyn derbyn ceisiadau cyffredinol. Bydd y rhai sydd eisiau rhedeg ar ran Ymchwil Canser Cymru yn gallu sicrhau eu lle ar 15 Hydref am £10 yn unig, drwy addo codi £500 i’r elusen erbyn 17 Tachwedd 2027.

Boed yn farathon cyntaf, yn ymgais i guro amser personol neu’n her er cof am rywun arbennig, gall rhedwyr droi pob milltir yn gyfle i gefnogi ymchwil canser yng Nghymru.

Dywedodd Tash Smith, Rheolwr Gyfarwyddwr Front Runner Events:

“Rydyn ni’n falch iawn o groesawu Ymchwil Canser Cymru i fod yn brif bartner elusennol cyntaf i Marathon Mawr Cymru.

“Mae digwyddiad 2027 yn cynrychioli pennod newydd arwyddocaol i Marathon Mawr Cymru, ac mae cael elusen sydd â hanes mor gryf a rôl mor bwysig yn cefnogi ymchwil canser yng Nghymru wrth wraidd y digwyddiad yn gwneud y cyfan yn arbennig tu hwnt.

“Gydag Ymchwil Canser Cymru yn dathlu ei 60 mlwyddiant, rydyn ni eisiau rhoi cyfle unigryw i gefnogwyr yr elusen fod yn rhan o’r marathon. Mae’r cynllun blaenoriaeth unigryw yn golygu y gall unrhyw un sy’n codi arian i’r elusen sicrhau eu lle yn gynnar ac ymgymryd â’r her 26.2 milltir gan wybod bod pob cam yn helpu i gefnogi ymchwil canser hanfodol.”

Cynhelir Marathon Mawr Cymru ar 17 Hydref 2027, gyda cheisiadau cyffredinol yn cael eu derbyn ar 20 Hydref 2026. Bydd rhedwyr sy’n codi arian i Ymchwil Canser Cymru yn cael cyfle cynnar i sicrhau eu lle, derbyn crys-t rhedeg Ymchwil Canser a chael yr holl gefnogaeth angenrheidiol yn ystod y cyfnod cyn diwrnod y ras.

Mae’r bartneriaeth yn rhan o rwydwaith elusennol ehangach, gyda’r partner codi arian swyddogol JustGiving yn helpu i wneud y gwaith o godi arian yn syml a sicrhau bod pob rhodd yn mynd ymhellach, fel bod y rhedwyr yn gallu canolbwyntio ar y peth pwysicaf un!

Gyda’i gilydd, mae rhedwyr, elusennau a chymunedau yn helpu i lywio’r digwyddiad marathon blaenllaw hwn yng Nghymru – gan greu mwy o gyfleoedd i gyfranogwyr wneud i’r milltiroedd gyfri go iawn.

Marathon Mawr Cymru 2027

• Dyddiad: Dydd Sul 17 Hydref 2027
• Lleoliad: I’w gyhoeddi.
• Pellter: Marathon unigol – 26.2 milltir
• Targed: 7,500 o redwyr
• Cyhoeddi’r llwybr: Tachwedd 2026