Progyffuriau Niwcleotidau fel Triniaeth ar gyfer Lewcemia Myeloid Acíwt (AML)

Nod y prosiect hwn yw gwella canlyniadau i gleifion yng Nghymru sydd wedi cael diagnosis o lewcemia myeloid acíwt (AML), sef canser difrifol y gwaed y ceir nifer uchel o achosion ohono’n lleol. Mae llawer o gleifion yng Nghymru yn wynebu opsiynau cyfyngedig o ran triniaeth, yn enwedig pan nad yw therapi safonol gydag Azacitidine yn gweithio mwyach, gan adael grwpiau bregus, gan gynnwys oedolion hŷn, mewn mwy o berygl o oroesiad gwael. Gallai datblygu mathau newydd o Azacitidine sy’n parhau i fod yn effeithiol fod o fudd uniongyrchol i gleifion yng Nghymru wrth gynyddu llwyddiant triniaeth a lleihau marwolaethau. 

Mae’r prosiect hwn yn datblygu’r genhedlaeth nesaf o brogyffuriau Azacitidine sy’n gallu trin AML sy’n gwrthsefyll Azacitidine. Gan fod y prosiect yn canolbwyntio ar Gymru, mae’n galluogi profi ac optimeiddio yn y boblogaeth leol, gan sicrhau hyfywedd clinigol o fewn seilwaith presennol GIG Cymru. Wrth leihau anghydraddoldebau mewn triniaeth a chynyddu cyfraddau goroesi ar gyfer cleifion AML yng Nghymru, mae’r prosiect yn alinio â blaenoriaethau Ymchwil Canser Cymru ac yn cryfhau ymchwil canser drosiadol dan arweiniad Cymru. 

I gleifion yng Nghymru, mae gan yr ymchwil hon y potensial i ddarparu triniaethau AML mwy effeithiol, gwella goroesiad, a lleihau anghydraddoldebau mewn canlyniadau canser. Yn y tymor hwy, mae’n cefnogi arloesedd dan arweiniad Cymru mewn therapiwteg canser ac yn sicrhau bod cleifion lleol yn elwa’n gynnar ar ymchwil arloesol.