Optimeiddio atalyddion GATA2 newydd fel therapiwtegau wedi’u targedu ar gyfer lewcemia myeloid acíwt sy’n gwrthsefyll therapi

Nod y prosiect hwn yw gwella canlyniadau i gleifion yng Nghymru sydd wedi cael diagnosis o lewcemia myeloid acíwt (AML), sef canser y gwaed sy’n ymosodol ac sydd â chyfraddau goroesi gwael ac opsiynau cyfyngedig o ran triniaeth, yn enwedig pan ddaw’r clefyd yn wrthiannol i therapi. Er derbyn cemotherapi dwys, mae llawer o gleifion yn atglafychu oherwydd bod poblogaeth fach o fôn-gelloedd lewcemia yn goroesi’r driniaeth ac yn arwain at ailymddangosiad y clefyd. 

Bydd y prosiect hwn yn mynd i’r afael â’r prif achos hwn dros fethiant y driniaeth, wrth ddatblygu therapi wedi’i dargedu sydd y cyntaf yn ei ddosbarth, ac sydd wedi’i anelu at fôn-gelloedd lewcemia. Mae’r prosiect yn adeiladu ar ddarganfyddiadau a gyllidwyd gan Ymchwil Canser Cymru yn gysylltiedig ag atalyddion moleciwlaidd bach GATA2, sef protein sy’n cael ei or-fynegi’n annormal mewn lewcemia myeloid acíwt sy’n gwrthsefyll therapi, ac sy’n hanfodol ar gyfer parhad clefydau. Wrth optimeiddio’r cyfansoddion hyn a’u profi mewn samplau sy’n deillio o gleifion, bydd y prosiect yn anelu at gyflymu eu dilyniant tuag at ddatblygiad cyn-glinigol a’u trosi i ddefnydd clinigol yn y dyfodol. 

I gleifion yng Nghymru, mae’r ymchwil hon yn cynnig y potensial ar gyfer triniaethau mwy effeithiol, y gellir eu goddef yn well, cyfraddau atglafychu is, a goroesiad gwell. Yn y tymor hwy, mae’n cefnogi datblygiad therapïau canser arloesol, dan arweiniad Cymru, gan gryfhau arbenigedd ymchwil lleol, a chynyddu’r tebygolrwydd y bydd cleifion yng Nghymru yn elwa’n gynnar ar ddatblygiadau clinigol newydd.