Beth sy’n gwahaniaethu celloedd T sy’n adweithiol i ganser ac sy’n deillio o brofiotigau

Mae’r prosiect hwn yn adeiladu ar arsylwadau clinigol trawiadol sy’n dangos y gall profiotig rhad wella goroesiad hirdymor yn sylweddol ymhlith cleifion â chanser yr ysgyfaint a chanserau eraill wrth ei gynnwys ochr yn ochr â thriniaethau safonol. Gallai deall sut y gall ymyrraeth mor syml arwain at fanteision sylweddol drawsnewid gofal canser, yn enwedig mewn lleoliadau sydd â chyfyngiadau ar adnoddau. 

Mae ymchwilwyr yng Nghaerdydd wedi darganfod bod y profiotig hwn yn ysgogi poblogaeth anghyffredin o gelloedd imiwnedd, sef celloedd T Vγ9Vδ2, sy’n gallu lladd ystod eang o gelloedd canser yn uniongyrchol. Yn hollbwysig, dim ond is-set fach o’r celloedd hyn – a ysgogir yn unigryw gan y profiotig – sydd â’r gweithgarwch gwrthganser hwn. Bydd y prosiect yn pennu beth sy’n gwneud y celloedd hyn yn arbennig a pham eu bod yn perfformio’n well na chelloedd imiwnedd tebyg a ysgogir gan gyffuriau confensiynol. 

Wrth ddatgelu sut gall microbiota’r perfedd ysgogi imiwnedd gwrthganser cryf, gallai’r gwaith hwn arwain at therapïau newydd a fforddiadwy sy’n gwella triniaethau canser presennol. Mae potensial cryf gan ddulliau o’r fath i fod o fudd yn fuan i gleifion yng Nghymru, gan y gellir ychwanegu’r profiotig at driniaethau safonol y mae’r cannoedd o gleifion canser yng Nghymru yn eu derbyn yn rheolaidd bob diwrnod. Yn y pen draw, bydd hyn yn lleihau costau ac yn gwella canlyniadau ar draws nifer o fathau o ganser.