Datblygu Firotherapi Manwl ar gyfer Glioblastoma

Glioblastoma (GBM) yw’r math mwyaf cyffredin o ganser yr ymennydd mewn oedolion, ac mae tua 16,000 o achosion yn cael diagnosis yn flynyddol yn y DU. Mae gan GBM brognosis echrydus, a dim ond ~12% o’r sawl a gafodd ddiagnosis o’r clefyd sy’n goroesi 5 mlynedd. Mae triniaethau presennol ar gyfer GBM wedi’u cyfyngu i lawdriniaeth, lle bo modd, ynghyd â chemotherapi. Gyda’i gilydd, mae’r triniaethau hyn yn ymestyn goroesiad cyfartalog rhwng ~5 mis a ~18 mis. Mae GBM yn parhau i fod yn ganser lle mae angen clinigol sylweddol nas diwallwyd.

Yn y prosiect hwn, byddwn yn gwerthuso therapi newydd cyffrous ar gyfer GBM. Mae’r therapi newydd hwn yn “feirws clyfar”, a luniwyd i heintio celloedd GBM yn unig gan ddefnyddio marciwr sy’n doreithiog ar gelloedd canser. Nid yw celloedd iach yn cael eu heintio. Gan weithio gydag arweinwyr ym maes canserau’r ymennydd a llawfeddygaeth yr ymennydd, byddwn yn ymchwilio i botensial y “feirws clyfar” hwn i drin GBM gan ddefnyddio samplau cleifion yn uniongyrchol o’r clinig. Byddwn yn peiriannu’r “feirws clyfar” hwn ymhellach fel ei fod, ar ôl heintio celloedd GBM, yn gorfodi celloedd canser heintiedig i greu meddyginiaethau gwrth-ganser sy’n ysgogi’r system imiwnedd i adnabod yn well a lladd celloedd canseraidd Bydd yr astudiaeth hon yn bwysig wrth ddiffinio llwybr tuag at drosi therapi newydd pwerus ar gyfer GBM at ddefnydd clinigol.